Þegar þetta er skrifað, sitjum við um borð í Sri Lanka Airlines á leið frá Beijing til næsta áfangastaðar, Bangkok.  Búnir að fara í gegnum myndirnar og gera upp restina af Beijing stoppinu.

Gærdagurinn hófst á því að við komum okkur upp að Forboðnu borginni tiltölulega snemma og var pælingin að kíkja í heimsókn til Maó formanns.  Við komumst hinsvegar ekki inn í grafhýsið þar sem töskur og myndavélar voru stranglega bannaðar.  Við þurftum því að sætta okkur við að sjá BARA Forboðnu borgina.   Tókum okkur góðan tíma í að skoða hvern krók og kima.  Borgin var ansi mögnuð og greinilegt að að kínverskt keisaralíf hefur verið sannkallaður dans á rósum.

Þegar við vorum orðnir sáttir með heimsóknina í borgina, gerðum við enn eina tilraunina til þess að læra á þessi prik því engin eru hér íslensku hnífapörin og þjónarnir ekki heldur.

Svo var stefnan tekin á að skoða Temple of Heaven, eftir að hafa labbað verslunargötuna og skoðað ýmislegt á leiðinni.  

Eftir góðan tíma þar, var haldið áleiðis heim, Jón upp á hostel en Gunni áfram upp að Ólympíuleikvanginum.  Um kvöldið var svo ausandi rigning, þrumur og eldingar.  

Eftir að það stytti upp, var svo tekin ákvörðun um að fara aftur á Reggae-staðinn góða og þar tekið þægilegt kvöld við góða tónlist.  Starfsfólk staðarins voru þvílíkt sáttir að sjá okkur aftur og í lok kvölds vildu þeir svo fá hópmynd af okkur og þeim.

Næst á dagskrá, Bangkok...